La Scola media mercantila (HMS) ei la suletta scolaziun media ch'ins siara giu cun in diplom da mistregn renconuschiu digl Uffeci federal da formaziun e tecnologia. Quella scolaziun cuoza cugl onn da practicum quatter onns ed entscheiva suenter la tiarza secundara. Ei setracta d'ina scola dil scalem secundar II ch'ils giuvenils visetan duront tschun dis ad jamna, pia ina scola cumpleina. Ella colligia ina profunda scolaziun generala cun scolaziun da mistregn. Il diplom ei adequats al diplom sco commerciant/a e possibilitescha l'entrada directa el mund da lavur. Culla maturitad professiunala HMS eis ei pusseivel d'entrar senza examens en scolas aultas.

Entras ils practicum el secund ed el quart (39 jamnas) onn da scolaziun vegn simplificau l'entrada el mistregn.

Denter auter preparein nus las scolaras ed ils scolars sin examens naziunals ed internaziunals (FCE, DILS, SIZ, ABACUS). Entras la purschida da 5 lungatgs promovin nus fetg las habilitads da communicaziun.

Suenter il tierz onn da scolaziun eis ei pusseivel d'entrar ella 5avla classa dil gimnasi senza examen da recepziun. Aschia eis ei era pusseivel da contonscher la matura gimnasiala. Suenter haver absolviu il cuors general da preparaziun per la Scola aulta da pedagogia dil Grischun san ins sescolar tier scolasta ni scolast.