Campiunadi grischun dallas scolas medias 2012
Igl ei buca simpel per ina pintga scola da semesirar al campiunadi grischun dallas scolas medias cun ils gigants Scola cantonala, Aschera e co. E tuttina gartegia ei als teams dil CFS adina puspei da contonscher plazs al podest. Il recept da success? Motivaziun, voluntad da prestaziun ed ina buna purziun Surselva-Power...
Il turnier da bal a canaster dil campiunadi grischun dallas scolas medias ha giu liug ils 27-9-2012 a Cuera. Ils CFS – ch’ei igl organisatur da quell’occurrenza – ei sco mintg’onn staus representaus cun in team da damas ed in team dad umens. In’entschatta plitost targlinonta dil team dad umens e la dira concurrenza han beingleiti menau alla disillusiun. Ils umens dil CFS ein simplamein buca vegni sin turas. Ni l’excellenta lavur dil giugadur Yves Steger ni ils nunstunclenteivels conters dils umens davontier han saviu midar bia. Ei ha uonn buca vuliu tonscher per dapli che per il 5avel rang.
Auters ei il maletg dallas damas sepresentaus: Las damas dalla Surselva ein immediat vegnidas sin turas. La harmonia, la flexibladad e la forza mentala nunballuconta dil team han fatg ellas fetg fermas. Igl ei reussiu mo allas damas dils extraordinaris finalists Aschera e Kanti da frenar las sursilvanas. Il tierz plaz final ei stada la meriteivla paga per quella super prestaziun da team.
