Scrinaris/ias

Scrinaris/Scrinarias produceschan mobilias ed exequeschan lavurs da construcziun interna ni fabricheschan elements da construcziun e monteschan els. Cun maschinas modernas elaboreschan els lenn massiv, materials da lenn, materias sinteticas e metals. Igl emprendissadi cuoza quater onns.

Il menaschi d’emprendissadi ei responsabels per la formaziun pratica. Tut secund menaschi d’emprendissadi san ins differenziar denter las direcziuns mobilias / construcziun interna, baghetg / finiastras ni las direcziuns plitost raras roder sco era construcziun da skis.

Els cuors externs vegn la formaziun pratica approfundada ed exercitada. Cunzun duein las emprendistas ed ils emprendists era emprender cheu il diever correct dallas maschinas.

Duront la scolaziun ha l’instrucziun liug in di ad jamna. La Scola professiunala industriala Surselva intermediescha allas emprendistas ed als emprendists las enconuschientschas dil mistregn teoreticas els suandonts secturs: enconuschientschas professiunalas e dil material, diever dallas maschinas ed enconuschientschas fundamentalas cun maschinas da CNC, dessignar dil rom, quens dil rom sco era basas els secturs ecologia, chemia e fisica.

Miradur/as

Miradurs/Miraduras lavuran ella construcziun aulta ni bassa, nua ch’els construeschan baghetgs, punts ed auter. Els fan mirs da tievlas, crap natural ni betun. Leutier monteschan els palancaus, fan lavurs da ligiadira e mettan bischels da canalisaziun. Sin baghetgs novs lavuran miradurs el liber, tier midadas d’in baghetg e renovaziuns savens era els baghetgs. La scolaziun cuoza treis onns.

Il menaschi d’emprendissadi ei responsabels per la formaziun pratica ed intermediescha las suandontas lavurs: lavurs da mir, lavurs da betun, lavurs da lingias e lavurs specialas.

Els cuors externs a Sursee vegn la formaziun pratica applicada approfundidamein e basas professiunalas vegnan exercitadas.

Duront la scolaziun ha l’instrucziun liug in di ad jamna. La Scola professiunala industriala Surselva ei responsabla per las enconuschientschas dil mistregn teoreticas e tracta ils suandonts secturs: scienzia dil material da construcziun, construcziun dil baghetg, dessignar dil rom e quens dil rom.

Splitting

Emprendistas ed emprendists cun liug d’emprendissadi en Surselva che han giu ina scola elementara romontscha frequentan la Scola professiunala industriala Surselva el rom dil model da splitting, nua che silmeins in tierz dall’instrucziun da formaziun generala ha liug per romontsch.

Ell’instrucziun da formaziun generala acquistan las emprendistas ed ils emprendists ina savida fundamentala impurtonta per lur mintgadi da pli tard. Il sectur societad ei organisaus tematicamein e cumpeglia temas sco politica, economia, dretg, diever da daners e segiradas, partenadi e convivenza, lavur e provediment, sistem da taglia e bia auter.

Il sectur lungatg e communicaziun ei integraus ell’instrucziun tematica. Las emprendistas ed ils emprendists perfecziuneschan lur cumpetenzas linguisticas e communicativas ed ein alla fin digl emprendissadi habels da scriver ina lavur d’approfundaziun (VA) structurada e retschercada bein.